Sultan Salah ud Din Ayubi and Nile (Chapter#01)

  صلاح الدین ایوبی اور دریائے نیل: 

 شمالی افریقہ کی شہ رگ جس میں پانی آنے کا جشن مصر کے پہلے سلطان کی نگرانی میں منایا جاتا تھا

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                        صلاح الدین ایوبی کا خاکہ

 

     1181عیسوی ہے اور ماہ ستمبر کا ایک دن،، قاہرہ کو پانی فراہم کرنے والی نہر ابومناجہ کا بند توڑنے کا وقت قریب آ رہا تھا اور شہر کے باسی بیتابی سے اس لمحے کا انتظار کر رہے تھے جب دریاِئے نیل کا ٹھاٹھیں مارتا پانی اس نہر میں داخل ہونا تھا۔

نہر کے ایک کنارے پر قاری تکبیر پڑھ رہے تھے اور دوسرے کنارے پر نقارے بج رہے تھے۔

مصر اور قاہرہ کے سالانہ کیلنڈر کے اس اہم ترین دن کے موقع پر ملک کے حکمران سلطان صلاح الدین ایوبی اپنے پورے جاہ و جلال کے ساتھ دریاِئے نیل اور اس نہر کے سنگم پر موجود تھے۔ 

    

                 800عیسویسلطان صلاح الدین کے قلعے سے قاہرہ اور دریائے نیل کی وادی کا تصوری منظر۔( تصویر کے بائیں حصے میں اہرام مصر بھی دیکھے جا سکتے ہیں)

اس بار ان کا سامنا کسی فوج سے نہیں بلکہ قدرت سے تھا۔ مصر، قاہرہ اور ان تمام ممالک اور خطوں کے لوگ جن کا انحصار کسی نہ کسی طرح دریائے نیل کے پانی پر تھا، صدیوں سے ہر سال اگست اور ستمبر کے ان دنوں کا انتظار کرتے تاکہ یہ معلوم کیا جا سکے کہ اس سال دریائے نیل میں کتنا پانی آئے گا۔

مؤرخ جانتھن فلپس نے اپنی کتاب "دی لائف اینڈ لیجنڈ آف دی سلطان صلاح الدین"میں دریاِئے نیل میں پانی آنے سے متعلق تقریبات کا تفصیلی ذکر کیا ہے۔ انھوں نے بتایا کہ جب سُنی مسلمان صلاح الدین ایوبی مصر کی اسماعیلی شیعہ فاطمی خلافت کے وزیر اور پھر اس کی دو سو سالہ خلافت کے اختتام کے بعد خود حکمران بنے تو انھوں نے بہت کچھ تبدیل کیا۔ لیکن ایک چیز جو قائم رہی وہ دریائے نیل پر ہونے والی سالانہ تقریبات تھیں۔

ستمبر 1181 میں بھی فاطمی دور کی زبردست رسومات کی تصاویر دیکھی گئیں جب بروکیڈ اور لینن زیب تن کیے اہلکار بڑی تعداد میں سلطان کے ساتھ حاضر تھے۔ شرکا میں قرآن کے قاری، اُمرا، سپاہی، اہلکار اور عام حاضرین بڑے ہجوم کی صورت میں موجود تھے۔ اس موقع پر خاص طور پر تیار کیے گئے خیمے میں تعظیم کا انتہائی تفصیلی اہتمام کیا گیا۔ 

 

فرعون اور دریاِئے نیل کے جشن کا سلسلہ:

دریائے نیل کے سیلاب کا آغاز جون کے وسط میں ایتھوپیا اور وسطی افریقہ کی جھیلوں کے علاقے میں بارشوں سے ہوتا ہے۔ آہستہ آہستہ پانی کی سطح بلند ہوتی رہتی ہے اور اگست کے آخر یا ستمبر کے شروع میں انتہائی سطح تک پہنچ جاتی ہے اور پھر اکتوبر اور نومبر میں نیچے جانا شروع ہوتی ہے۔

فلپس لکھتے ہیں کہ پانی کے بہاؤ کا باقاعدہ ریکارڈ بہت ضروری تھا اور اس کا حل "نائلومیٹر"کی صورت میں سامنے آیا تھا۔ فسطاط اور گیزا کے بیچ میں دریائے نیل کے جزیرہ الروضہ کی سب سے مشہور نشانی یہی تھی۔

خاص طور پر بنائی گئی عمارت میں تعمیر کیا گیا ڈھانچہ دراصل پانی کی سطح ناپنے والی ایک بہت بڑی چھڑی جیسا تھا۔

وہ لکھتے ہیں کہ اس کا اصل مقصد یہ بتانا تھا کہ دریا میں پانی ضروری سطح تک پہنچ گیا یا نہیں۔ پانی کی سطح ضمانت تھی کہ مصر کے لیے یہ سال کیسا رہے گا اور اس برس فصل کیسی ہو گی۔

حکمران انہی معلومات کی بنیاد پر ٹیکس کا تخمینہ لگاتے تھے۔ انھوں نے بتایا کہ بارویں صدی کے مؤرخ المخزومی نے سنہ 1169-1170 کی اپنی تحریروں میں اس حساب کتاب کا تفصیلی ریکارڈ موجود ہے۔

نائلومیٹر سے پانی کی سطح کی پیمائش دراصل نہروں کو کھولنے کا بھی اشارہ ہوتا تھا۔ ان نہروں میں پانی ایک ترتیب سے جاری کیا جاتا تھا۔

اس موقع کی اہمیت کے پیش نظر صدیوں سے بہت سی رسومات وجود پا چکی تھیں۔ ان رسومات کا سلسلہ فرعونوں کے زمانے تک ملتا ہے لیکن تقریباً دو سو سال قائم رہنے والی اسماعیلی شیعہ فاطمی خلافت ان رسومات کی شان اور شوکت کو ایک نئی سطح پر لے گئی۔

 

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                جزیرہ الروضہ پر نصب نائلومیٹر

 نائلومیٹر کی تاریخ:

نائلومیٹر کا معائنہ کرنے والے اہلکار کی اہمیت کا اندازہ اس بات سے لگایا جا سکتا ہے کہ مؤرخ عماد الدین نے سلطان صلاح الدین  ایوبی کی سوانح میں اس دور میں نائلومیٹر کے ذمہ دار اہلکار کی موت کا بھی ذکر کیا۔

فلپس اس دور کے مؤرخ عماد الدین کے حوالے سے لکھتے ہیں کہ "نائلومیٹر" کے مقام کا تعین سنہ 861 میں عباسی دور میں ہوا تھا تاکہ پانی کے اتار اور چڑھاؤ کے بارے میں معلوم کیا جا سکے۔ عبدالسلام ابن ابی الرداد اپنی سچائی اور علم کی وجہ سے جانے جاتے تھے۔ انھیں سیلاب کے موسم میں امرا کی خلعت بھی انعام میں مل چکی تھی اور جب (1179 کے آغاز میں) شعبان میں ان کا انتقال ہوا تو سلطان نے ان کے بھائی کو ان کی جگہ تعینات کر دیا۔

1181عیسوی میں اگست کے مہینے میں سلطان صلاح الدین نائلومیٹر سے پانی کے بہاؤ کی پیمائش کے موقع پر خود موجود تھے۔ اندازہ تو سب ہی لگا لیتے تھے لیکن پانی کی سطح کے بارے میں حتمی فیصلہ ماہر اہلکار کا ہی ہوتا تھا۔

 

دریا کے پانی کی سطح ’سرکاری راز

فلپس بتاتے ہیں کہ اس زمانے کی ایک دستاویز کے مطابق پیمائش کا نتیجہ خفیہ رکھا جاتا تھا اور وزیر سے پہلے کسی کو معلوم نھیں ہو سکتا تھا۔ اس زمانے کے پیمانے کے مطابق 16 کیوبک کا بہاؤ بہترین سمجھا جاتا تھا، 20 کیوبک خطرناک سیلاب کی خبر دیتا تھا اور اگر پانی کی سطح کم ہوتی جیسا کہ 1179 میں ہوا تو اس کا نتیجہ زرعی پیداوار میں کمی کی صورت میں سامنے آتا تھا اور تجارتی بحری جہازوں کے لیے قاہرہ کا سفر بھی مشکل ہو جاتا تھا۔

فاطمی دور کے خلفا خود ان تقاریب کی قیادت کرتے تھے اور اس دور کی تحریروں میں ان تقاریب کا تفصیلی احوال محفوظ ہے۔ صلاح الدین نے بھی بحیثیت وزیر فاطمی خلیفہ کے ساتھ یہ تقریب دیکھی تھی۔ انھوں نے اس موقع پر نکلنے والے جلوس اور رسومات کے بارے میں تفصیلی ہدایت نامہ بھی طلب کروایا تھا۔

 

 

To Be Continued …………….Thanks For Read and Your Appreciate